Dy ndeshje brenda pak ditëve me bashkëmoshatarët e Kazakistanin, një fitore 1-0 në ndeshjen e parë dhe një humbje me të njëjtin rezultat në të dytën për Shqipërinë e 19 vjecarëve me Erjon Bogdanin që ndryshoi thuajse gjithë formacionin në takimin e dytë ku kundërshtarët gjetën golin e fitores në minutat shtesë.

Gjithsesi për Zenel Gavazajn, vëllanë e futbollistit që luan te Skënderbeu dhe Kombëtarja e madhe, Enis Gavazajt, nuk ishte një paraqitje e keqe ajo e 19-vjeçarëve kuqezi.

“Ishte një ndeshje e mirë nga ne, por fati na ktheu shpinën. Gjithsesi besoj që ndeshjet e tjera do të luajmë më mirë dhe do të marrim fitore”, tha Gavazaj.

Gjithsesi futbollisti që militon për Lirinë e Prizrenit nuk harron të kujtojë se bëhet fjalë për miqësore që shërbejnë për formimin e një grupi që si objektiv ka kualifikimin në Elite Raund për europianin e kësaj grupmoshe.

“Synimi ynë dihet që është kualifikimi në Elite Round. Besoj se kemi bërë një grup të mirë dhe po njihemi me njëri-tjetrin, ndaj do të synojmë kualifikimin”, u shpreh sulmuesi i Kombëtares U-19.